aaj fiza mein kuch dhuan sa hai

suraj jaane kyon aaj daba sa hai
roshni ka jamghat bhi kum sa hai
dikhai deta nahin kuch dur aage
aaj fiza mein kuch dhuan sa hai

tahelne is subah mein chal diye
kahin kinchati yeh fiza bhi hai
mahek aa rahi dur phooloon se
yahan ek mahekti baghiya bhi hai

mahek aati hai dhara ki aaj yun
jaise woh bhi kuch bheegi si hai
chal raha hoon nange paaon liye
ghaans par oss ki boond si hai

soch raha hoon aapne swapne ko
uski yaad abhi kuch tazaa si hai
jaga diya hairaan kar usne mujhe
woh sapna bhi bas tumhara hi hai

kuch der ruk jaata hoon yahan
ki yahan hawa sans lene ko hai
bahut lambi hai dagar wapasi ki
woh aaj bhi akele chalani to hai

main phir kho gaya us sooch mein
mera jeena bhi mere soocha sa hai
nahin sooch paata hoon aage kya ho
ki aaj fiza mein kuch dhuan sa hai