tujhse dur rehkar

tujhse dur rehkar meri koi hasti nahin
tanha yeh bedard zindagi, zindagi nahin

yaad aati hai, har pal unhi lamhoon ki
jin mein saath mere, tere siwa koi nahin

aaj aalam hai, saansein ahsaan karti hain
jaise inki mujhse koi bhi pehchaan nahin

hoon intezaar mein har dum, dum bhar kar
kambhakht ziddi yeh dum bhi nikalta nahin

ab dhundali si yaad aati woh surat teri
par zahan mein uske siwa kuch bhi nahin

lagta hai tum khade ho us parde ke peeche
guhar par bhi kyon tum nakab hatate nahin

hai dhal raha aftaab badd raha shab ki aur
tum mujhe kyon apni sahar dikhate hi nahin

hai iltija 'Kapil' ki tujhse to yeh aakhiri
ki mera khud pe bhi ab koi ikhtiyaar nahin